تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

تذكير بمساهمة فاتح الموضوع :

*آخر البنات المحترميــن *

دي قصه جامده جدا وعجبتني أوووووي ويارب تعجبكم
بس حكتبها على حلقات
بس هي طويلة شوية بس جامدة آخر حاجة بجد
أنا حبتدى بالحلقة الاولى ولو عجبتكم قولوا لى عشان أكملها
و إن شاء حنزل كل يوم حلقة .. إن شاء الله الاقي تفاعل منكم
ـــــــــــــــــــــــ

المكان :
كلية تجارة بأي جامعة ف أي مكان ف مصر
الوقت : أول يوم ف الدراسة

الشخصيات:
أحمد إمام : "سقيط كبير" شاب في الثالثة والعشرين ولازال في السنة الثالثة بالكلية.
منى ممدوح : فتاة في الثامنة عشرمدللة والديها صغيرتهم بعد شابين يكبرانها بسنوات، في أول سنة لها بالجامعة, فتاة جميلة محجبة.
كريم : صديق أحمد بالسنة الرابعة وهو طبعا أصغر من أحمد.
شيرين : صديقة كريم وأحمد ,بالسنة الثالثة , قريبة لــ منى من بعيد.
سارة: صديقة منى من الكلية فتاة محبوبة ومؤدبة

ميرنا : صديقة منى الاخرى و هى ايضا فتاة جميلة و محبوبة
***************************

الحلقه الأولى

حديث يدور بين شابين يدخنان في الكافيتيريا في الكلية وهو مكان يكشف بقية ساحة الكلية
أحمد وهو يلتفت بجسده وعينيه خلف فتاة تسير أمامه نافثا دخان سيجارته
أحمد: الدفعة الجديدة شكلها جامد مووووووت.
كريم:
ايوة يابني مش الغفر الي كانوا على أيام دفعتنا, ولا صحيح إنت استقبلت
دفعتنا واللي قبلها واللي بعدها ,وياتري بقي إنت ناوي تنجح السنة دى ولا
زي كل سنة.
احمد: ايه السيرة الغم دي , النهاردة أول يوم , خليك خفيف كده عشان أحبك.
كريم: يييييييه اهي شيرين وصلت حخلع أنا بقي عشان دي جايه كمان ومعاها واحدة صاحبتها.
كاد أحمد ان "يخلع" مع كريم ولكنه رأي ان الفتاة التي مع شيرين من الدفعة
الجديدة , ورأي أن من واجبه كأقدم واحد بالكلية أن يستقبل الدفعة الجديدة
التي طبعا كانت حلوة ورقيقة.
*********************
منى : أنا خايفة يا شيري اني ميبقاليش اصحاب في الكلية.
شيرين: أهي دي بقي آخر حاجة ممكن تقلقك في مكان زي ده , دا احنا هنا بنقول حنودي الاصحاب فين .
منى : لا ياستي بقولك ايه انا ماليش في الشلل , أنا مبحبش قعدة البنات مع الصبيان , أنا اخواتي قالولي......
شيرين: ياادي إخواتك الي عاملينلك وش في دماغك , يا بنتي هنا عادي , الدنيا كلها أصحاب في بعض , إنتي مش كان ليكي أصحاب صبيان في المدرسة.
مني:
ايوة , بس كلهم اصحابنا وجيراننا من زمان ومفيش منهم خوف لأنهم كانو
مصاحبين صاحباتي, وبعدين أنا مكنتش برضه معاهم أوي انا مبحبش الجو ده.
شيرين بصوت خافت: أنا قلت برضه انتي هتتعبيني.
ثم بصوت عالي : إيه ده كريم وايمو أهم .......هااااااي.
مني تصيح وهي تحاول اللحاق بشيرين التي توجهت نحو الشابين : إنتي رايحة فين؟ مش كنا هنجيب الجدول بتاعي؟

اقتربت الفتاتان من أحمد لأن كريم كان قد غادر , عدل أحمد من هندامه كما يفعل كلما قابل وجه جديد

شيرين : ايمووو انت فين ياراجل .
رد عليها برتابة: في الدنيا هكون فين يعني ؟
شيرين :إيه الغلاسة دي وبعدين كريم ماله كده جري زي الي عليه فلوس لحد .
أحمد: أصله افتكر واحد صاحبه كان مستنيه .
شيرين : آه.
أحمد بتسبيل : مش تعرفينا .
شيرين : لا مش هعرفك ,مش سكتك خالص على فكرة .
شعرت منى بالحرج من الكلام الذي يدور وحاولت ان ترد بأي شيء فصمتت
أخرجت شيرين تليفونها المحمول وطلبت رقماً :
شيرين: أيوه يا واطي ..... جريت ليه أول ما شفتني ........يا راجل ...
ومدت برجليها بعيدا قليلا عن أحمد و منى
أحمد: إنتي بقي سنة اولي ؟
أ* (أحمد في رأسه) اكيد والا كنت شفتك .
منى بخجل :آه
م* (منى في رأسها) يوووه يا شيرين خلصي بقي.
أحمد: معاكي الجدول ولا أجيبهولك .
مني وقد ارتبكت : لا ... ماهي شيرين هتيجي معايا... يعني ..هنشوفه .
أحمد: طب إستني خليكي هنا.
وإنطلق كالصاروخ مغادرا إياها ,في نفس الوقت الذي انهت فيه شيرين المكالمة
شيرين: الله؟ فين الواطي التاني؟
منى : معرفش , قالي استني وجري , تعالي نمشي.
شيرين: هو قال راجع ولا قال إيه؟
منى: مقالش حاجة يلا نمشي بقي.
شيرين : لا غستني أهو , ماله بيجري كده ليه ؟
وصل أحمد لاهثاً ومد يده بورقة الى منى
أحمد: إتفضلي يا ستي , جدول سنة اولي.
نزعت شيرين الورقة من يده وهي تجذب يد منى بعيدا
شيرين: متشكرين يا سيدي , بس ريح نفسك , قلتلك مش سكتك .
إعترض طريقهم قبل إن تغادرا
أحمد : إيه إيه , رايحين فين ؟
شيرين : إنت مش جبت الجدول , يلا باي بقي البنت جديدة وهلففها في الكلية.
تجاوزتاه وهو يتابعهما ببصره قائلا
أحمد : آجي معاكو.
شيرين تهتف وهي تجر منى ورائها جراً
شيرين : لا شكراً.
ظل أحمد يتابعهما ببصرة وهو يقول في نفسه
أ* ودي مين دي يعني اللي شيرين خايفة عليها أوي كده؟؟؟ هتكون تفرق إيه عن البنات التانية ؟؟؟
منى وهي تكاد تركض خلف شيرين , التي إنطلقت وكأن كلب يجري خلفها
م* ودا مين دا يعني اللي شيرين خايفه عليا منه أوي كده , هي مش كانت بتقول لي الناس هنا كلهم أصحاب عادي؟؟؟
ــــــــــــــــــــــــــــــــــــــــــــــــــــــــــــــــــــــ
إستنونــــا بقى ف الحلقة الجايــــة
متنسوش تقلوا لى رأيكم إيه عشان أعرف بس حكملها ولا إيه النظام

آآآآآه صحيح ما انت إسمكـ أحمد برضـــه مش كده !!

عامة هنشوف هيحصــل إيه .. إستنى الحلقات الجايــة Jaban 1

الحلقه الثامنه

فاقت منى قليلا بعد كلام شيرين , وقررت للمرة الثانية ان تنسي احمد "قال ايه" ,
واصبحت حتى تنساه تجاهد نفسها كي لا تفكر به, وبهذه الطريقة تضاعف تفكيرها
فيه, وذلكـ لإنه عندما تحاول التوقف عن التفكير بأحد فانك تبذل مجهود اكبرمن ان تفكر
فيه , ونخرج بذلك من الامر ان منى نست احمد به.
***************
احمد: متعرفش نمرة الواد وائل عبد الكريم؟
كريم : ليه ؟, والله انا لو من الواد دا معرفكش تاني.
احمد: ماهو مش انا الي هكلمه , انت الي هتكلمه.
كريم: وحياة امك ؟ ليه بقي ان شاء الله.
احمد: مش عشاني والله , كنت عايز احجز عنده درس.
كريم: ليه ؟ ناوي تختصر وتاخد الكلية م الاول؟
احمد: مش طالبة ظرف, مش ليا يا ظريف دا لمنى .
كريم: على اساس لما هتقولي منى هفهم , منى مين يابني؟.
احمد: قريبة شيرين.
كريم: انت رجعت تاني؟؟ مش كنا خلصنا.
احمد: ايه يابني انا بعمل خدمة لشيرين.
كريم: على ماما ,ومن امتى بقي الحنية دي؟ من ساعة ما قلبتك ولا من ساعة ما مطلعتش الرحلة ؟
احمد: بقولك ايه اطلع من دماغي , هتتصل ولا لأ؟.
كريم: هتصل عشان خاطر شيرين بس, وعشان خاطر الواد الي سيبته صاحبته الغلبان دا بس.
احمد: تلاقيه هو نفسه نسي , انت لسه فاكرلي يا كيمو, اخص عليك.
كريم: ولما هو نسي , ماتكلمه انت ياخويا.
احمد: اللهم طولك ياروح هو انا معرفش اطلب منك حاجة ابدا الا لما تطهقني كده.
كريم: لأ وعلى ايه , هكلمه, بس انتي متزعليش مني يا قطة.
احمد: طب يا روح امك خلص.
كريم: طيب ما تزقش.
***************
منى: انتي عارفة يا سارة احسن حاجة اني لما قررت انسي احمد دا خالص, جيت على نفسي اهه وشلته من دماغي, يعني خالص ,بجد, اه.
سارة:..................
منى: انتي مبترديش عليا ليا؟
سارة: عشان دي عاشر مرة تقوليلي الكلام ده من الصبح , دا غير انك قولتيهولي امبارح في التليفون , بالله عليكي انتي كده نسيتيه؟.
منى: اه ... طبعا....انا مبفكرش فيه خالص.
سارة : لا ابدا ... اصل هو انا اللي بحب اجيب سيرته , بحب اتكلم عنه , وماليش
سيرة غيره م الصبح , الله يسامحك يا شيخة انتي واحمد بتاعك دا.
**************
كريم: على فكرة, كلمتلك الواد , وطبعا مجبتش سيرة سعادتك .
احمد: مشكور يا سيدي.
كريم : وانت بقي عايز ايه من منى دي؟
احمد: ولا حاجة اهي حدوتة جديدة .
كريم: هي البت حلوة بس, شكلها مش بتاعة بمب وفراقيع.
احمد: لا يا سيدي , هي بتاعة بمب وفراقيع, ما شفتش لما قالت لي واحد صاحبي هيشرحلي,
وبعدين لو مكانتش كده ماكنتش ردت عليا لما اتصلت بيها, انت بيدخل عليك
الكلام دا, دا تقل ,وبكرة هوريك.
كريم: طب ولو طلعت مؤدبة بجد يا فالح.
احمد: وانا هخسر ايه يعني , لو كانت مؤدبة خير وبركة اهو حتى الواحد ينضف , وان كانت بتتقل هوريها هي بتتقل على مين.
كريم: ماهي لو مؤدبة اصلا مش هترضى تصاحبك.
احمد: يا حبيبي كل بنت ليها سكة, لما نشوف دي سكتها ايه.
كريم: ربنا يسترعلى البنت.
احمد: سيبك انت من السيرة دي, هنسهر فين النهارده

مشكوره على اتوبيك الرائع منتظرين باقى الحلقات

ونتمنى المزيد من الروعه

تحياتى لكى وتقبلى مرورى

حودااااااااااااااااا

الشكر لله وليكـ ع المرور والرد .. نورت التوبيكـ

(الحلقة التاسعة)

منذ هذه الحلقة يتبلور دور الشيطان في اذهان كل من منى واحمد ويظهر في كلامهم مع نفسهم"

م* هه وبعدين , هتفضلي متنحة للتليفون كتير , متردي , هيكون عايز ايه يعني؟, هو مش قال هيكلمك , وانتي ما اعترضتيش , مالك بقي؟
لا لا , احنا مش اصحاب عشان نتكلم في التليفون, وبعدين انا اصلا ماسحة نمرته ,هو لو صاحبي كنت سجلت النمرة تاني
وهو حد قال حاجة؟ , الراجل كتر خيره بيعملك خدمة , وانتي بكل قلة ادب مش عايزة تقبليها, ولا حتى تردي عليه ترفضيها بالذوق
هو لو فيه حاجة مهمة هيتصل تاني ,صح؟
اهو بيتصل تاني اهه, ردي بقي ,دا اكيد فيه حاجة ضروري, اقولك , ردي واعرفي الموضوع واقفلي على طول, بالذوق برضة يعني لو حب يحور قصري
صح, وهو ايه الي هيجري يعني , انا هرد ومش هطول.

***************

أ*
متردي بقي , هفضل ارن كتير , اوفففف ,..................تررن تررن, يعني
اعمل ايه عشان تردي؟ الله يقطع البنات على سنين البنات الي قالين قيمتنا
عليهم
ماشي
يا سيدي ع التقل , وعاملالي مؤدبة , دي مدوباهم اتنين, برضة وراكي ,
بتعمليهم عليا انا , اذا كنتي انتي مدوباهم اتنين فانا بقي مبعدش, وهتصل
تاني اما نشوف اخرتها معاكي.

**************
منى: آ..ألو.
م* ..............
احمد: السلام عليكو.
أ* جامدة الدخلة دي
منى: وعليكم السلام ورحمةالله وبركاته.
م* ...........
احمد: ازيك يا منى ؟
أ* ازيك يا مغلباني
منى: الحمد لله, انت ازيك؟
م* انت هتحور, قصر
احمد: اخبار القانون معاكي ايه.
منى : زفت .
احمد: على فكرة انا كلمت صاحبي اللي قلت لك عليه , وحجزت لك عنده , بس كنت عايز اعرف اذا كانت المواعيد تناسبك.
منى: يوم ايه وايه.
احمد: فيه سبت واتنين وخميس , وفيه حد و تلات و جمعة.
منى : انا ينفعني حد وتلات وجمعة.
احمد: اوكي هبلغه , واقولك على المعاد والمكان .
منى : طيب ان شاء الله.
أ* ندخل على المهم
احمد: يعني مش هتحتاجي حد يشرحلك .
م* اه..وبعدين بقي
منى: لا ان شاء الله , اصل المادة دي غلسة اوي انت عارف.
احمد: اه عارف مانا ذاكرتها سنتين ف اولي.
منى: اه صحيح , منتا خبرة , مش كنت انت اللي تدي دروس , دا حتى صاحبك اللي بقي معيد مذاكرش المواد اد منتا ذاكرتها.
م* انتي بتعملي ايه؟, قصري
ايه؟؟ هو انا قلت حاجة
احمد: ايوه , منا كنت ناوي ادي دروس بس مستني اما اعيد رابعة عشان ابقي ذاكرت كل سنة مرتين .
أ* الله؟؟ , ماحنا بنعرف نهزر زي الناس اهه
منى: طب مش لما تنجح تالتة الاول .
احمد: لا ماهو مش معقول ادبلر التالتة , دانا حتى ابقي دكتوراه في المواد.
منى: هههههههههه
أ* انزل بالتقيل
احمد: على فكرة صوت ضحكتك حلو اوي في التليفون .
منى : ...شكراً.
م* انتي بتعملي ايه لسه على التليفون؟, اقفلي.
احمد: لا, انا بتكلم بجد, او يمكن انتي مبتضحكيش معايا كتير في الكلية , دانتي بتكشري حتى لما بتشوفيني.
منى: ايه اللي خلاك تقول كده؟
م* انا؟؟ , ابدا والله , انا بس ببقي مخضوضة.
احمد: معرفش بحس انك متضايقة , عايزة تخلصي , كده.
منى: لا ابدا, عادي يعني.
م* اخلصي يا مني متحوريش
أ* رجعنا لعادي , هتشلني ان شاء الله
احمد: يعني العادي بتاعك انك تكشري , مع ان ضحتك حلوة اوي.
أ* اتسبتي بقى
منى: لا , ان شاء الله هضحك كتير.
م* انت بتحمري ليه دلوقتي مش انتي الي مقفلتيش؟
احمد: ياريت , وتسمعيني ضحكتك على طول .
أ* اما نشوف آخرتها
منى: .........
احمد: انتي اتضايقتي؟ , انا مكانش قصدي احرجك على فكرة, انا آسف.
أ* مثلي عليا مثلي
منى: لا مفيش حاجة.
م* ايه اللي مفيش؟ , انتي هتستعبطي
احمد: طيب يا ستي هبلغك ان شاء الله بالمواعيد اول ما عرفها.
أ* يلا كفاية عليكي كده
منى: ماشي .
م* ايوه كده اقفل بقي
احمد: يلا باي.
منى: سلام

******************

أ* اتسبتت يا معلم , والله ولسه شديد زي زمان
م* ايه الي انا عملتو دا؟ مكانش لازم احور, يارب سامحني انا آسفة

مشكوووووور ه

بس انا افضل انك تاخدى فتره بين الحلقه والتانيه علشان نتشوق للحقله

القادمه

ومشكوره لمجهوداتك
تحياتى لك حودااااااااااااااا

بس كده !! ده إنت تؤمر

الشكر لله وليكـ حودا باشاااا .. نورت

ههههههههههههههههههههههه
احمد ده جامد بجد

بس يا ريت يا invisibl girl

متنزليش حلقات غير لما انا ارد عليها
علشان مفيش حلقات تفوتني

وايه التوقيع العسل ده ههههههه

اوكيشـــن يا معلم إنت تؤمر ..

والله التوقيع بتاعكـ هو اللي عســل .. بيحسسك بالأمل وكلمة ساقط منووووووورة SugarwareZ5

زي نورك كده

عقبالك كده لما تنوري قصدي تنجحي يا عسل

الحلقه العاشره

منى: هو فين البيت بقي , يوووووووووووه.
وقفت منى تكاد تبكي , لثالث مرة تدور في هذا الشارع ذهابا وايابا, لقد اخبرها
احمد ان هذا هو العنوان, وهي متأكدة ان هذا هو المكان الذي شرحه لها , برج
الرحمة , امام محل ملابس اطفال كوكو بارك, ها هو المحل يحتل ناصية كاملة
تطل على شارعين, اين برج الرحمة؟ , سألت الناس ,ولم تصل الي شيء, ماذا
عساها تفعل؟.

م* ياربي بقي , اعمل ايه دلوقتى؟ معادش الا عشر دقايق , اتصل باحمد اسأله ؟؟
لااااا, اهو كلو الا دا ,احمد ايه ؟ انتي اتجننتي؟
ايه هو الي لأ؟, امال هتعملي ايه يعني
لا مش هتصل بيه ابدا, انا اخري معاه انو اتصل اداني العنوان في السريع وقفل , خلاص انتهينا
اه واديكي تايهة اهه, خلاص بقي خليكي واقفة مكانك , وتعالي يوم التلات برضه اقفي مكانك
يباااااااي , طيب هتصل بيه , بس هي المرة دي بس
******************

أ* اخييييرا , دانا بقالي نص ساعة مستني تتصلي , كل دا بتقاوحي نفسك
احمد: السلام عليكم.
أ* يا واد ياجامد
منى : عليكم السلام , احمد بقولك ايه انا مش عارفة البيت فين؟
أ* طب منا عارف
احمد: بيت ايه ؟
م* دا وقت غباوة انت كمان
منى : البيت اللي فيه الدرس.
احمد: اهههه, انتي فين دلوقتى ؟.
منى: عند كوكو بارك.
احمد : هتلاقيه قدام المحل.
أ* دوري من هنا لبكرة
منى : قدامه ناصيتين ادخل من انهي شارع ؟
احمد: ناصيتين ؟؟ لا انا مش فاهم حاجه
أ* هههههههههههههههههه
منى : منا مش عارفة ومفيش وقت.
احمد: طب بقولك ايه , انا قريب من المكان ,خليكي في مكانك , عشر دقايق وهكون عندك.
منى: لأ , انت بس قولي ادخل منين.
احمد: ماهو انا اللي فهمته من اللي شرحلي المكان قولتهولك , بس انت استني, انا جاي , باي
أ* استنيني بقي
منى: آ...آآآآ... انت يازفت , قفلت ؟ الله يحرقك.
م* هعمل ايه انا دلوقتي ,انا كان ايه اللي خلاني اتصل
ياستي اسكتي بقي , الحق عليه انه جاي يلحقك , اظبطي انتي شكلك المبهدل دا واعدلي نفسك كده
***************
وصل احمد متمخترا , يكاد ينفجر من الضحك وهو يري منى واقفة كالتلميذ المضروب
"علقة", ولا يبدو عليها انها فهمت شيئا من مخططه, وصل في الثامنة وعشر
دقائق.
أ* هههههههههههههههههههههههههههههه
"مش قادر يتكلم من كتر ما بيضحك في دماغه"

**************
وقفت منى تنظر يمينا ويسارا , وعيناها لا تفارقان الساعة التي كانت تتحرك ببطء
شديد بالنسبة لوضعها منتظرة احمد, وبسرعة بالنسبة لميعاد الدرس.
م* اهه وصل , يادي الكسوف, لما نشوف هيحلها ازاي الفالح

أ* اخييييرا , دانا بقالي نص ساعة مستني تتصلي , كل دا بتقاوحي نفسك ههههههههههه

بجد الحلقه دي زي العسل

طب كويس إنها عجبتك .. ميرسي ع المتابعــة

ميرسي ليكي بجد علي الحلقات المسليه بجد

وابقي طمنينا علي النتيجه بتاعتك

ميرسي لله وليكـ بس على الله ما تزهقش عشان هي طويلة جداااااااا

وإن شاء الله أول ما أعرف النتيجة حقول على طول .. بس يارب خيــــر

انا لسة متابع القصة النهاردة
قصة ظريفة وجميله وان شاء الله
هتابعها علي طول
شكرا invisible girl

وازيك يا احمد واحشني والله
والف مبروك

إن شــاء الله ..وأنا أكيد يشرفني إنكـ تتابع القصــة وتنور التوبيكـ دايما
ويا رب تعجبكـ

شكرااااا ليكـ يا مان

الحلقــة الحادية عشــر

احمد: معلش اتأخرت عليكي.
أ* انا قاصد الطعك
منى: لا مفيش حاجه , عادي.
م* دانا كنت هتشل بقالي ربع ساعة
احمد: ادي ياستي كوكو بارك , ايه الي موقفك هنا بقي؟ ,البرج بعد ما نعدي العربيات , على الرصيف التاني.
أ* ايوه ,قدام عنيكي يا عميا
منى: رصيف تاني؟؟!! , انت مش قلت انه تاني شارع اول عمارة, قدام كوكو بارك ؟؟.
م* نعم ياخويا ؟؟؟
احمد:على الناصية , قدام كوكو بارك , يعني تعدي العربيات.
أ* وكنت عارف انك غبية وهتفهميها على كيفك , زي منا عايز برضه

منى وهي تكاد تنفجر غضبا
منى: ما انا ما كنتش عارفة ان قدام كوكو زفت فيه شارع رئيسي وشارع جانبي, طبعا مجاش في بالي اني اعدي الناحية التانية.
م* انا اصلا مفهمتش منك حاجة ساعة ما شرحتلي
احمد: معلش انا اسف مفهمتكيش كويس.
أ* وانتي شربتيها ,هتروحي مني فين؟

نظر احمد في ساعته متظاهرا الانزعاج
احمد: احنا اتأخرنا جامد ,دي الساعة بقت 8 وربع.
أ* قدامي يا فالحة
منى: طيب بسرعة بقي.
م* انا همشي معاه في الشارع لوحدنا ازاي دا , يا ارض انشقي وابلعيني
************
مشت منى بجانب احمد وبينهم مسافة كبيرة وكأنهم لا يسيران سويا, بينما سار احمد
لا يتكلم وكأنه لا يعنيه ان كانت تسير بجانبه او في شارع تاني ,وان كان
يحاول اظهار نفسه بمظهرالمؤدب.
وصلا للمكان في اقل من دقيقتين .
احمد: اهه البرج .
قرأت منى على مدخل البرج
منى: برج الرحمة, اخيرا.
التفتت منى اليه, وزفرت قائلة
منى: انا مش عارفة اشكرك ازاي .......؟؟, شكرا بجد.
م* مع انك لففتني السبع لفات بس شكرا
احمد: تشكريني على ايه يا منى ؟ انتي عبيطة؟
أ* انتي لسه شفتي حاجة

وقبل ان ترد عليه استعدادا للصعود , سمعا اصوات لشباب يخرجون من المصعد ,
فالتفتا ينظران ناحية مصدر الصوت ,حتى وصل اصحاب الصوت اليهم
احمد: حسان .

صاح احمد وسلم على الشاب الاول , ثم على الفتاتين اللتين معه, بينما وصل
مجموعة اخرى من الشباب ينزلون على السلم, وسلم معظمهم على احمد بينما منى
تكاد تنكمش من الاحراج , لقد تعرفت علي معظمهم , وكيف لا وهم جميعا سنة
اولى , اي زملائها بالكلية.

م* يانهار ابيض, انا ايه اللي بيحصلي ده ,
وقال انا اللي خايفة حد يشوفني معاه في الشارع, يقومو يشوفوني في مدخل
العمارة اللي فيها الدرس بتاعي كأنه صاحبي وبيوصلني, يادي الفضيحة
احمد: انتو كنتو عند وائل صح؟
حسان: اه , مجموعة تمانية , بس هو خلص في السريع ,انتي كنتي طالعة يا منى ولا المجموعة الجاية؟
لم يبد على منى انها تستطيع الكلام اصلا فقد كانت ممتقعة جدا, حتى ان احمد رد بدلا منها
احمد: لا كانت طالعة المجموعة دي, هو نزلكو بسرعة ليه؟
أ* هي هيجيلها سكتة قلبية اصلا ,هههههههههههههههههههه
حسان: دا بس كان بيتعرف علينا وكده وبيظبط الدنيا وهنبدأ المرة الجاية.
أ* طب منا كنت عارف انه بيعمل كده
التفت حسان الي منى قائلا
حسان: متخافيش يا منى مفاتكيش حاجة, بس تعالي المرة الجاية بدري ؟
تململت الفتاتين اللتين مع حسان فقال
حسان: ماشي يا ايمو , سلام انا عشان اوصل الجماعة , اشوفك في الكلية.
ثم ضرب على كتفه وهو يغادر مسرعا قائلا وهو يبتسم
حسان: متبقاش تأخرها المرة الجاية , سلام.

وقع قوله على منى كالصاعقة التي افقدتها النطق.
م* هي مين دي الي ما يأخرهاش ؟ّّّّّ!!! , يا نهار اسود ومهبب
أ*ههههههههههههههههههههههههههههههههههههههه
التفتت احمد الي منى بعد رحيل الجميع وهو يجاهد للسيطرة على ابتسامة تقاوم شفتيه, محاولا ابداء الاسي على وجهه
احمد: انا اسف يا منى بجد, فاتتك الحصة دي.
أ* المرة الجاية مش حأخرك , ههههههههههههه
منى كالمصدومة
منى: انا عايزة اروح.
م* روح يا شيخ الله يسامحك
احمد: حاضر ,تعالي اركبك تاكسي
أ* انا قلتلك مش هتيجي بمزاجك هجيبك غصبا عنك
منى: لا شكرا , انا هعرف اركب تاكسي.
م* ابعد عني الله يسترك, كفايه كده
احمد : طيب براحتك,انا همشي , سلام.
أ* براحتك يا مزة , بس انتي خلاااااص, كل الناس عرفت انك تبعي , كفاية عليكي كده النهاردة لحسن تموتي مني

منى :.........
م* انا ايه ياربي اللي بيحصلي ده
التفتت منى واختفت من امامه بسرعة وكأن شبحا يطاردها بينما توقف هو يراقبها معجبا بنفسه , وكيف ان الامر كله حدث كما خطط له تماما.
أ* خلاص ياموني , هانت , اصل هتعملي ايه والحكاية لابساكي لابساكي؟, مسيرك هتسلمي,
والزن على الودان امر من السحر , منا هجيبك هجيبك يا مدوخاني

م*...........................................................
" عاجزة عن التفكير تماما من الصدمة "
********************

علي فكره انا زعلان من احمد النهارده بجد حرام عليه اللي عمله في مني

هي معملتشي حاجه علشان تستاهل كل ده

هو اينعم عمل اللي كان نفسي اعمله بس مهنشي عليا اعمله

بس شجعني ان افكر من تاني اعمله
بس الاول لما اشوف نتيجه اللي عمله ايه

والله [ندعوك للتسجيل في المنتدى أو التعريف بنفسك لمعاينة هذه الصورة] ما شــــــــــــــــــــــاء الله .. طب على خيرة الله

اهو كله ف الآخر حيطلع على دماغ اسي أحمد [ندعوك للتسجيل في المنتدى أو التعريف بنفسك لمعاينة هذه الصورة] عشان اللي بييجي ع البنات الغلابة هو اللي بيتروق ف الآخر SugarwareZ5

ال غلابــــــــــه ال

ده اللي بيفكر يجي عليكم بيتوووووه

اساليني انا

انا كنت عارف انها هتيجي علي دماغ احمد

علشان كده قولت استني الاول لما اشوف ايه اللي هيحصل

SugarwareZ5

آخ منـــــــــكم آخ SugarwareZ5

انا لما كنت صغير كنت شايف البنات زي الملايكه وكنت بحبهم وبحترمهم جدا

بس للاسف النظره دي كل مدي وكل ما بتتبدد وبصراحه لغايط دلوقتي مش لاقي انسانه تغيري الفكره دي من دماغي

حلقات رائعه

تقبلى مرورى

معلش زي ما فيه الوحش اكيد فيه الكويــس
بس عشـــان الوحش دايما بيغطي على كلــه الواحد مش عارف يميز او يختار الصــح ويشوف الكويــس فين

ربنــا يوفقكـ

dody2020 كتب:: حلقات رائعه

تقبلى مرورى

ميرسي جدااا الأورع ردكـ .. وأكيد شرفني مروركـ
نورت

تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

اقتراحك يهمنا

آخر البنـــات المحترميــــــــــــــن