حكايات ألف خيبــــــــة و خيبــــــــة .. ( ممنوع دخول مرضى القلب والضغط والسكر )

[ندعوك للتسجيل في المنتدى أو التعريف بنفسك لمعاينة هذه الصورة]

جائني يا قراء يا كرام .. نوادر وحكايات وكلام
عن بنت ثلاثينية .. غارقة في الظلام
وعرسان مقشفين .. غرقانين في الاوهام
وعن امهات العرسان المفترية..اللي بتاكل اللحمة نية
وبتشرب عصير زلط في الصبحية
تعبوا البنية وشلفطوها ..وبجهلهم خبطوها

احكي يا بت يا مخبوطة عن النكسة
والعرسان اللي جابتلك الوكسة



كليب الخيبات :




فهرس الخيبات :
الخيبة الاستفتاحية :


﴿ العريس الذكي ! ﴾

الخيبات الرسمية :

﴿ خطوبة 1﴾
﴿ خطوبة 2﴾
خطوبة3 :
﴿ قبل كتب الكتاب ﴾
﴿ بعد كتب الكتاب ﴾
﴿ خطوبة 4 ﴾









خيبات متفرقة :

﴿ رغاي .. وكمان بتكدب !﴾

﴿ الحادثة.. !﴾










﴿ ام العريس .. سوسة ! ﴾






﴿ عريس ولا جزمجي ؟!﴾





﴿ أكبر مني بـ 20 سنة !﴾





﴿ المقلب !﴾
﴿ بيغير من العيلة الصغيرة !﴾

﴿ انا شامة ريحة !﴾

﴿ الشبشب والبيبسي ! ﴾

﴿ ام العريس مفترية !﴾
﴿ عقدوني من الموبايل (1) ﴾
﴿ عقدوني من الموبايل (2) ﴾
﴿ عقدوني من الموبايل (3)؟ ﴾
﴿ عقدوني من الموبايل (4) ؟﴾




﴿ العريس عايز بنت ناضجة ! ﴾


﴿ مين فيكوا اللي هيتجوز ؟! (1)﴾

﴿ مين فيكوا اللي هيتجوز ؟! (2) ﴾
﴿ مين فيكوا اللي هيتجوز ؟! (3)﴾
﴿ مين فيكوا اللي هيتجوز ؟! (4) ﴾
﴿ مين فيكوا اللي هيتجوز ؟! (5)﴾
﴿ البروكة !﴾
﴿ البشمهندس محمد !﴾
﴿ كرت شحن ! ﴾
﴿ أونكل عبد العزيز ! ﴾
﴿ خطيبي هيسافر .. لولولولولي ! (1)﴾




﴿ خطيبي هيسافر .. لولولولولي ! (2)﴾
﴿ يا صغنن ..!﴾

﴿ جعلوني عانساً !﴾



﴿ يافرحتي!﴾


﴿ الأوضة !﴾





﴿ يوم التحرير !﴾
﴿ نانسي عجرم !﴾


﴿ الورطة !﴾


﴿ الخطة (1)﴾

﴿ الخطة (2)﴾
﴿ الخطة (3) ﴾



﴿ الخطة (4)﴾
﴿الخطة (5)﴾

﴿عريس من امريكا(1) ﴾

﴿عريس من امريكا (2)﴾















ـــــــــــــــــــــــــ




انتظزروني

جائني يا قراء يا كرام .. أنه وفي احدى الأيام
مخبوطة لما كان عندها 26 سنة .. وقاعدة مرتاحة البال ومتطمنة
سمعت اتصال بين مامتها .. ووحدة ست قريبتها
جايبالها عريس .. بتقول انه محترم ومش تعيس
واتفقت مع ماما على موعد المقابلة
اللي هيقابل فيها العريس اهل مخبوطة
ويشرب عندهم الشاي ابو فتلة

قفلت مامة مخبوطة السكة مع الولية ..
ولقت جرس الباب بيضرب بطريقة هستيرية
فتحت امها الباب
ولقت شاب غريب مانعرفوش
مدهول على عينه وعقله ملطوش





الشاب : السلام عليكم ..
ماما : وعليكم السلام !
- مش ده بيت الدكتور فلان ؟
- ايوة .. مين حضرتك ؟
- انا فلان الفلاني .. كلمتني قريبة حضرتك عن الانسة بنتك

ده العريس !! ..
لسة الموعد بعد يومين ايه اللي جابه دلوقتي ..
ده باين عليه مسروع يا مخبوطة

احد دلالات السرعة اللي عنده انه فضل لازق عند الباب ..
نظام هدخل يعني هدخل
خلى ماما تتكسف وتقوله اتفضل
تلحق نفسها قبل ما يطلب ايدي وهو واقف على السلم


العريس : الحقيقة يا طنط انا سمعت كتير عن الانسة مخبوطة وانا يشرفني جدا اطلب ايدها
ماما : واحنا نتشرف ..
- ممكن اقابلها ؟
- ايوة بس هي عندها صاحباتها دلوقتي معاها في الاوضة وماكناش نعرف ان انت جاي النهاردة ماعملناش حسابنا ...

طبعا ماكانش في حد عندي ..
انا كنت قايمة من النوم ساعتها وعنيا وارمة زي الدبانة
لو خرجتله هقعد اتاوب في خلقته !

لا لا لا

ما ينفعش خااالص اخرج قبل ما اعمل الطقوس العرسانية اللازمة
ده في سلسلة اجراءات معقدة ومعاملات بقى ودمغات واختام ..
ايه هو فاكر نفسه في امريكا !!
ده انا لسة هستلف من بنات الجيـ .. أأ قصدي يعني هجهز الهدوم اللي هلبسها ...
بعد ما اعمل دراسة جدوى على الدولاب ومحتوياته
واجتماع لبنات العيلة عشان نقرر هلبس ايه
يووووه موال طويل ..

والأهم من ده كله بقى
اني لو خرجتله دلوقتي هيتمرع
آه .. ويقولك دي ما صدقت خبطت على بابها خرجتلي تجري
لاااااا
خليه يتشحتف شوية


- طب شوية بس .. ولو لدقايق !
- أأ.. ما ينفعش كده قدام صاحباتها .. احنا حددنا مع قريبتي موعد عشان تتفضل مع الست والدتك .. وان شاء الله يوميها تشوفها ولو عجبتك ربنا يجيب اللي فيه الخير ..
- والله يا طنط .. انا قلبي ارتاحلكوا قبل ما اشوفكوا ..
- ربنا يخليك ..
- انا يا طنط مش زي بقية الشبان .. لا بدور على بنت صغيرة ولا عندي لستة طلبات ..
( يا سلااااااام ايه التنازل العظيييييم ده ! .. عريس من غير لستة !! .. ياااااه .. هو لسة في عرسان من غير لستة في ايامنا دي ! )
- باين عليك عاقل ..
- انا كل اللي عايزه الستر ..
( ده انت عريس مكسور الجناح كمان ! )
- احنا نتشرف بيك ..
- الشرف ليا يا طنط والله .. طب .. هما صحبات مخبوطة هيفضلوا قاعدين كتير ؟
- هـهـه .. انت عارف قعدة البنات بقى .. عموما احنا منتظرينكوا في المعاد اللي حددناه ان شاء الله
- ان شاء الله .. مع السلامة
- مع السلامة

بعد ما خرج العريس خرجت من الاوضة وسألت ماما :
- هو ايه اللي جابه دلوقتي .. اهبل ده ولا ايه !
- والله منا عارفة .. الظاهر مستعجل
- طب هو شكله ايه يا ماما ؟؟
- هه .. اه .. كويس
- ايه يا ماما هو وحش ولا ايه ؟!
- انا عارفة .. واحد زي بقية الناس .. هو لازم يكون شبه راغب علامة يعني !

انا قلبي مش مطمن
الظاهر انه العريس ده هيكون زي اغلب عرسانك يا مخبوطة ..
منحدر من احدى سلالات الشامبانزي
يا ستي ..
ضل شمبانزي ولا ضل حيطة


وجاء اليوم المنتظر ..
جه العريس ومعاه والدته .. ودخلت اسلم عليهم ..
لفت عيني في الصالون ..
فين العريس ؟! .. انا شايفة ست قاعدة .. وجمبها ولد صغير شكله يدي على 17 سنة
يا نهااااااار !!
هو ده ؟؟؟!!!
ده انا حجمي 3 اضعاف حجمه !!
وايه الأناقة دي !
لابس جينز وكوتش ابيض .. في عريس يلبس كوتشي ؟! وابيض كمان !
ومغرق شعره جل .. قصدي يعني ما تبقى من بقايا شعره

اتارييييك مش عامل لستة


وفوق ده كله
عمال يرغي طول الوقت مع اخويا وما كلمنيش !
من كتر الرغي بتاعه مش فاكرة هو كان بيقول ايه الحقيقة

العريس : رغي رغي رغي رغي رغي رغي رغي رغي
اخويا : ايوة ..
- رغي رغي رغي رغي رغي رغي رغي رغي رغي رغي
- ممم .. مزبوط
- رغي رغي رغي رغي رغي رغي رغي رغي رغي رغي
- فعلا فعلا ..
- رغي رغي رغي رغي رغي رغي رغي رغي رغي رغي


ده مش معبرني خالص
الظاهر اني ما عجبتوش !
عموما يكون احسن .. ده لو صحباتي شافوني قاعدة جمبه في الكوشة هيفتكروا ان ده ابني كان تايه ولقيته ..





وكما هو معتاد
مشي العريس من هنا .. ولبستني حالة النكد من هنا
ايه ده ! .. اتجوزه ازاي ده ؟
لا شكل ولا شخصية ... ولا حتى ذوق !
وانا قاعدة كده بكامل اناقتي .. وما قاليش ازيك !
عمال يرغي مع اخويا وخلاص
قال يعني نظام استعراض غير مباشر قدام العروسة
ومامته .. اول مرة اشوف ام عريس غلبانة كده
ما نطقتش ولا كلمة
معاها حق ماهو .. مش مدي لحد فرصة يفتح بؤه




وبعد هذا اليوم المميز بأيام قليلة ...
اتصلت مرات قريبي اللي جابتلنا العريس الفظيع ده وكلمت
ماما :
- ايه رأيكوا في العريس ؟ كلمني وكان فرحان وقال انها عجبته اوي
( عجبته وما عبرنيش بكلمة اومال لو عجبتوش كان هيعمل ايه .. هيرجع على وشي ؟! )
ماما : ...... والله .. مش عارفة اقولك ايه
- ايه ؟
- يا حبيبتي انتي مشكورة طبعا انك بتسعي للخير بس يعني .. الشاب لا شكل ولا شخصية !
- انا عارفة انه متواضع من ناحية الشكل .. لكن مخبوطة بنت عاقلة وهتحكم عقلها !
( متواضع ايه ! ... ده خلصان خالص )
- اكيد طبعا .. بس ماحصلش قبول من مخبوطة .. ولا احنا كمان قبلناه
- خلاص انا هبلغه بقراركوا ده .. هيزعل اوي المسكين
- معلش ربنا يرزقه باللي تناسبه ..


وبعد الموضوع ده باسبوعين .. قريبة ليا تعرف الشاب ده .. كانت قاعدة صدفة مع مرات اخويا وقالتلها :
- انا مستغربة ازاي واحد زي ده يرفض بنت زي مخبوطة .. اتجنن ده ولا ايه ..
مرات اخويا : مش هو اللي رفضها هي اللي رفضته !!
- ازاي ! ده بيقول انه شافها وحس انها بنت معقدة نفسيا منذ الطفولة , وكانت بتبصله بنظرات مسكنة عشان تحنن قلبه و يوافق عليها .. قالك لا دي باين عليها مجنونة ومرضيش يتمم الموضوع !
- ايه !!!!




بقى انت اللي رفضتني يا كداب ! .. وتطلع عليا اشاعاتك الهباب
اني متعقدة منذ الطفولة ... !!
والدنيا عليا مقفولة !

رجالة آخر زمن ..
بيتكلموا ببساطة على بنات الناس
بدون اي تمن
ناسي لما كان لازق عند الباب .. مش عايز يتحتح زي ضلفة الدولاب
ولا منظره بالكوتشي المعفن ..
والشراب اللي طالعة رحيته ومنتن ..


وحطت مخبوطة ايدها على خدها .. بتفكر في العيال اللي بتتقدملها
داعية ربها يخلصها من هذه النوعية
اللي كانت السبب
في الوكسة العربية القوية

جائني يا قراء يا كرام .. أنه وفي احدى الايام
اكتشفت البت مخبوطة ..
صفات في خطيبها الدكتور البخيل .. تقصر العمر الطويل
وتتعب الصحة وتهد الحيل

لما كانت بنت اخت مخبوطة الصغنونة
بتحب تتكلم في التليفون
وتقول آلو لكل متصل .. بينتظر على الخط ومنشغل
***



تررررن تررررن

خطيبي : الو ازيك
- الحمدلله ازيك انت ؟
- انا الحمدلله .. بتعملي ايه ؟

في اللحظة دي جت الانسة بنت اختي
نونو صغيرة عندها سنة ونص .. لمحتني ماسكة السماعة ..
وبما انها مهووسة بالتليفون ..
يبقى لازم تمسك السماعة وتلخبط اي كلام في بعضه
وترجعهالي تاني
يا كده .. يا زن وعياط وصداع ويومنا مش هيعدي

جت البيبي وقفت جمبي وقالتلي : بتكلمي ألو ؟
قلت لباسم : ثواني .. ورديت عليها : ايوة يا حبيبتي بكلم عمو باسم ..
النونو : انا عايزة كلم أمو ..
خطيبي اتعصب : انتي سايباني وبتكلمي مين ؟!
- دي بنت اختي الصغيرة عايزة تكلمك ..
قام مزعق : مش عاااااااااااايز اكلم حد ... هو انا لحقت اتكلم معاكي ! .. ولا انا متصل عشان اكلم العيال ؟؟
( ايه الجنان ده ! .. )

- ايه يا باسم دي طفلة !
- هو انا عارف اكلم الكبيرة عشان اكلم الصغيرة !
- بلاش يا باسم ما تكلمهاش .. روحي يا نونو يا حبيبتي معلش عمو مش عايز يكلمك ..
( يمكن يحس قد ايه هو سخيف ! )
- البنت مشيت ؟
- ايوة
- طب كويس ... المهم ... وحشتيني
( الواد ده محتاج نقل دم فورا ... معندوش دم خالص !!! )
- طيب ..
- طيب ! .... ايه يا مخبوطة انتي اتدايقتي ؟
- لا ابدا هو في حاجة تدايق ؟!
- بتكلميني كدة ليه ايه اللي حصل ؟؟
- انت مش شايف نفسك بتزعق ازاي ؟! كل ده عشان قلتلك كلم البنت كلمتين !! ... دي عيلة صغيرة يا باسم وبتحب تتكلم في التليفون .. تكسفني وتكسفها كده ! انا مش قادرة اصدق ردة فعلك دي انت بتكره الاطفال اوي كده ؟؟؟؟!
- لا يا مخبوطة اوعي تاخدي عني فكرة غلط .. بالعكس انا بحب الاطفال جدا ..
- آه ماهو باين ..
- طب هاتيها اكلمها ..
- لا مش هتكلمها
- طيب براحتك ..
- مع السلامة عشان عايزة اروح الحمام
- كده ؟ .. طب هكلمك بعدين ..
- سلام
- سلام

ايه الوقعة المهببة دي يا بت يا مخبوطة !
دي اشكال تتخطبيلها ؟
ازاي يكرش البت ويشوف صوتك اتخنق وانتي بتتكلمي
وليه نفس يعيش دور الرومانسي !

هما شبان الايام دي مالهم كده ؟!
ياترى ايه السبب الرئيسي في ارتفاع نسبة العبط
في صفوفهم ؟ ..
واللي بدورها أدت لارتفاع نسبة العوانس !
الشيبسي ؟ .. ولا الفاست فود ؟ .. ولا السجاير ؟!
ولا دلع امه الزايد فيه


عموما يا مخبوطة
واضح انك لو استمريتي في الخطوبة الفاشلة دي ....
هتكون النهاية حاجة من الاتنين ..
يا اما خطيبك ده هيتوفى بحقنة هوا ..
تديهاله مباشرة في قرعته
يا اما هتموتي متشنجة وبؤك مشدود على جمب
قبل ما تكملي معاه اسبوع جواز ..
وشهر العسل يتقلب لشهر الشلل .. والناس تيجي تباركلك في الستشفى
بصراحة مشهد مأساوي يا مخبوطة


في الأوضة :

اختي : مخبوطة .. ايه اللي بيعمله خطيبك ده ؟ باين عليه مجنون .. ؟
- باين عليه ؟ ده مجنون رسمي !
- مش يمكن متدايق من حاجة تانية ؟
- لا لا .. هو كدة ماعندوش من الأحمر


لا يا مخبوطة ...
كل انسان يحتوي جسمه على عدد لا بأس به من ليترات الأحمر
انما اللي عند خطيبك ده .. اسمه مرض نفسي !
بيطلع عند الشبان اللي امهاتهم مدلعاهم زيادة
ومعوداه على الانانية .. وان كل حاجة بتبقى بتاعته لوحده
وآدي النتيجة

بقينا مش لاقيين رجالة عاقلين نتجوزهم !!
يا نتجوز مجانين يا نقعد من غير جواز خالص !
طب نعمل ايه !

يا بنات الوطن العربي ...


احب اقولكم ...




















احنا في ورطة




مشهد اخر ..

خطيبي لازق عندي في الصالون كالعادة ..
ودخلت بنت اختي الصغيرة مكسوفة ..
البيه لما شافها بلم وسكت .. وكأنها حد كبير

قمت قلتلها تعالي يا نونو يا حبيبتي ..
جت جري عليا فرحانة .. حملتها وقعدتها على رجلي
مسكينة مش عارفة ان عمو الدكتور الاقرع خطيب خالتها ... حاطط نقره من نقرها


خطيبي : ايه ده دي مش لابسة بامبرز !
انا : عادي مش مشكلة ..
- طب ما تخلي امها تاخدها تلبسها بامبرز بدل ما تعملها عليكي
- لا هي شاطرة مش بتعملها الا في الحمام .. صح يا نونو ؟
النونو : ثح ..
ضحكت مخبوطة على طريقة كلام البيبي الصغيرة ....
خطيبها اتغاظ ولونه اتغير ..
وكأنها بتضحك مع راجل غريب ..
مممم
على كده كمان عشرين سنة .. الراجل اللي يشوف مراته بتلاعب بيبي صغير مش ابنه ...
هيطلق عليها الرصاص وتبقى جريمة شرف ؟





خطيبي : ايوة يا عم .. شكلك بتحبيها اوي
- ايوة طبعا دي زي بنتي
- آاااه .. يعني لما نخلف هتحبيها اكتر من عيالنا !
( حقنة هوا يا مخبوطة في قرعته بسرعة ... بسرعة )
- لا مش اكتر .. هحبها زي عيالي بالزبط
- طيب يا ستي .. يا بختك يا نونو هانم .. اظن خلاص كده خليها تروح عند مامتها ..
- هي مدايقاك في حاجة ؟
- لا يعني عشان ناخد راحتنا ..
- محنا واخدين راحتنا اهو .. وبعدين هو احنا بنعمل ايه غير اننا بنتكلم ؟
- يعني ينفع اقعد اتكلم في كلام رومانسي وهي موجودة ؟
- وانت بتسمي الخناقات والنقار بتاعنا طول الوقت ده كلام رومانسي ؟
- طبعا ده ملح الخطوبة !
- ملح لما يكون كل فين وفين .. مش كل شوية
- الخلاصة مش عايزة تسيبي البنت ؟
- لا
- طيب يا مخبوطة زي ما انتي عايزة ....



***

و بص خطيب مخبوطة للعيلة الصغيرة بصة مش اللي هي ...
من فوق لتحت كده بطريقة حاقدة وغلاوية
ومن ساعتها وهو بيغير منها
ويتأفف من سيرتها
ولما تيجي البت .. يدور وشو عنها

كأنها راجل وهتخطفني منه ... أو عدو لدود هيبعدني عنه
باين عليه يا مخبوطة انسان مش كويس ...
لأن اللي بغير من عيلة صغيرة
ده اكيد واحد متيس


وحطت مخبوطة ايدها على خدها .. بتفكر في نفسية الواد
اللي خطبها
داعية ربها بعين مدمعة .. يخلصها من هذا الدكتور البخيل
ابو قرعة ممسوحة وملمعة .. وعقلية مريضة ومطرقعة